ده‌نگ کورده‌واری له‌ به‌رزی «ته‌میـره‌وا» هات / مۆحه‌مه‌د جه‌واد جه‌لیلیان
ده‌نگ کورده‌واری له‌ به‌رزی «ته‌میـره‌وا» هات  /   مۆحه‌مه‌د جه‌واد جه‌لیلیان
ناوه‌یل فره‌ ئاشناێگ له‌واێ: شه‌هرام نازری، که‌یهان که‌ڵهوڕ، حۆسه‌ین عه‌لیزاده‌، په‌رته‌و کرماشانی و ... گاهه‌س ئڕا یه‌کم جار بوود که‌ لێـوا وه‌ ئێ شیوه‌ له‌ یه‌ێ ئاواێ له‌ ناو یه‌ێ جه‌رخه‌ به‌شداری کردنه‌.
ریپورتێگ له‌ کووه‌و بیون گه‌وراێ گه‌ل کورد له‌ ئاوای «بانزه‌لان»:

ده‌نگ کورده‌واری
له‌ به‌رزی «ته‌میـره‌وا» هات

مۆحه‌مه‌د جه‌واد جه‌لیلیان

رێ فره‌ دیورێگ له‌ وه‌رمان نییه‌! له‌ یه‌ێ نێمه‌ڕوه‌ودویاێ هونک له‌ ئاخرین رووژه‌یل تاوسان؛ وه‌ ده‌نگ ته‌میوره‌ێ گرووپ شاخوه‌شین گووش ته‌کنم که‌ وه‌ گه‌رد زه‌نگ مۆبایل وه‌ خوه‌م تییه‌م. بڕێگ له‌ دووسه‌یل تێکوشه‌ر هۆنه‌ر و مووسیقاێ کوردی تووان له‌ یه‌ێ کووه‌و بیون گه‌وراێ نیشتمان له‌ ئاوای «بانزه‌لان» داڵاهوو به‌شداری بکه‌ن. له‌ دویاێ کات کوڵێگ منیش وه‌ مه‌یله‌واری وه‌گه‌ردێیان هاوڕێ بووم و که‌فیمنه‌ رێ تا ئیمه‌یش وه‌ نه‌وبه‌ێ خوه‌مان له‌ێ جه‌رخه‌ێ باێه‌خ داره‌ پشتگری بکه‌یم.
پرشه‌ێ خوه‌ر هێمان له‌ گوڵه‌ێگ له‌ پییه‌نی ئاسمان شانازی که‌ێـد؛ به‌ڵام دی ده‌ره‌قه‌ت و تێـژی جاران خوه‌ێ نه‌ێـرێـد. ئه‌گه‌ر خاس گووش بته‌که‌نی؛ له‌ ته‌مام جاده‌گان ئێ وڵاته‌ ده‌نگ پاێ پائیز وه‌ گووش ره‌سێـد. هه‌ر جار که‌ وه‌ ساته‌گه‌ نووڕم؛ ئه‌قره‌به‌یل کاتشماریش چمان ته‌قه‌لا که‌ن خوه‌ێیان وه‌ هه‌ڵه‌پڵه‌ وه‌ سات شه‌ش ئێواره‌ بڕه‌سنن؛ به‌ڵام ئیمه‌یش رێ فره‌ دیورێگ له‌ وه‌رمان نییه‌!
له‌ ناو رێ «کرماشان» تا «بانزه‌لان»؛ گه‌په‌یل خاسێگ وه‌ گه‌رد دووسه‌یل به‌یمنه‌ رێ؛ باسه‌یل کوڵێگ له‌باره‌ێ باوه‌ته‌یل جیاواز ک هه‌رکامێیان تویه‌نن له‌ جی خوه‌ێیان ساته‌یل فره‌ێگ ئڕا هیورده‌و بیون و گه‌پ دان بتوان.
تا ره‌سین وه‌ شوون «ته‌مووره‌یانه‌»؛ ته‌نیا یه‌ێ جار وسان کوڵـێـگ له‌ شار کووزه‌ران دێـریم و له‌ ناوهه‌ێن بڕێگ له‌ ناوچه‌یل ره‌نگین که‌ ته‌نانه‌ت له‌ وه‌رز تاوسانیش ره‌نگینی تایبه‌تی خوه‌ێیان دێـرن؛ یه‌ێ راس جاده‌ وه‌ په‌رتخ به‌یم. خاس زانیم که‌ رێ فره دیورێگ له‌ وه‌رمان نییه‌!
جاده‌یل دریژ و کوڵ فره‌ێگ که‌ له‌ وه‌رمان هه‌س؛ سه‌ر له‌ لیمان شێـونێــدن و ئڕا وه‌ دی کردن شوون به‌رنامه‌ێ ئمڕوو چه‌ن جار تیوش گیچه‌ڵ تییه‌یمن و وه‌ گه‌رد چه‌ن پرسێار تکراری له‌ مردم ئه‌و ناوچه‌ ده‌سمێیه‌ت گریمن. چه‌ن جوان ک له‌ په‌راوێـز جاده‌ وسانه‌؛ بێ یه‌ گ ئیمه‌ پرسێارێگ له‌لیان بکه‌یم؛ خوه‌ێان وه‌ره‌و نیشان «بانزه‌لان» ئاماژه‌ که‌ن؛ چمان ئه‌وقره‌ رێواره‌گان له‌لێان پرسیار کردنه‌؛ دی ئڕاێان دیارییه‌و بیه‌!
یه‌کم جار «ماڵ ته‌موور» له‌ دیوره‌و و له‌ بان به‌رزییه‌یل دیار و نادیار خوه‌ی وه‌ پیمان نیشان ده‌ێـد. بنه‌ماێ «خانگ ته‌میره‌» له‌ شان ئاو دڵڕفن و له‌ هه‌ناز ئاوای دیمه‌ندارێگ وه‌ یه‌ک که‌فتێیه‌ ک چه‌وه‌یل هه‌ر ئاێمه‌ێگ له‌ بان خوه‌ێ گیر ده‌ێد و وه‌ره‌و خوه‌ێ کیشه‌ێـد.
چه‌ن ره‌زار گه‌ورا له‌ ماشینه‌گان که‌ ته‌مام ئێ ده‌یشته‌ گردنه‌سه‌وه‌ر؛ خه‌وه‌ر له‌ کووه‌و بیون گه‌ل فره‌ێگ له‌ ئه‌ووینداره‌یل مووسیقاێ کوردی ده‌ێد.
دیاره‌ که‌ زوورم به‌شداره‌یل جه‌رخه‌ێ ئمڕوو؛ زامه‌ت فره‌ێگ ئڕا ئه‌وڕێ بردن ئێ به‌رنامه‌ کیشانه.
وه‌ گه‌رد تماشاێگ وه‌ شوون ئه‌وڕێ بردن ئێ رێ و ره‌سمه‌ و شنه‌فتن گه‌په‌یل مۆجری زانیمن که‌ دێــر ره‌سیمنه‌؛ وه‌ هڵه‌پڵه‌ خوه‌مان وه‌ ناوڕاس جه‌رخه‌ێ مه‌ردم ره‌سنیم.
ئمڕوو له‌ێره‌ دیور له‌ قاڵ و هاوار بێ وه‌لیفه‌ت شار؛ ئاێمه‌یل گه‌وراێگ زوورم ئڕا رێـز گرتن و قه‌ێـرزانی له‌ زامه‌ته‌یل بێ وێـنه‌ێ «ئۆستاد عه‌لی ئه‌کبه‌ر مۆرادی» ژه‌نیار خاون ناو ته‌میوره‌ له‌ ده‌ور یه‌ک کووه‌و بیونه‌.
ناوه‌یل فره‌ ئاشناێگ له‌واێ: شه‌هرام نازری، که‌یهان که‌ڵهوڕ، حۆسه‌ین عه‌لیزاده‌، په‌رته‌و کرماشانی و ... گاهه‌س ئڕا یه‌کم جار بوود که‌ لێـوا وه‌ ئێ شیوه‌ له‌ یه‌ێ ئاواێ له‌ ناو یه‌ێ جه‌رخه‌ به‌شداری کردنه‌.
ئمڕوو له‌ێـره‌ ژیان ته‌نیا وه‌ مه‌قام ته‌میوره‌ ژه‌نێـد!
هاتێ دیاری ته‌رین وه‌لیفه‌ت به‌شداری له‌ جه‌رخه‌ێ ئمڕوو ئڕا خوه‌م؛ دیدار بڕێگ له‌ دووسه‌یل و هاوڕێیه‌ل هێـژا بوود که‌ گشتێیان له‌ دویاێ ساڵه‌یل فره‌ێگ دوجاره‌ له‌ یه‌ێ شوون کووه‌و بیونه‌. بێ گومان ئه‌و دویاێ مه‌ردمیش له‌ێ وه‌لیفه‌ته‌ به‌بش نه‌مه‌ننه‌!
هه‌ناێ له‌باره‌ێ به‌رنامه‌ێ ئمڕوو گه‌پ ده‌یم؛ زوورم دووسه‌یل هاوڕێیـن که‌ چه‌وه‌ڕێ کووه‌و بیون گه‌لێگ تا ئێ ئه‌ندازه‌ نه‌یـونه‌!
ئمڕوو ئێره‌ تویه‌نیم وه‌ ناو نیشتمان « ده‌نگ و ره‌نگ » وه‌‌ هیور باریم؛ وه‌ هه‌ر لاێگه‌و ک تماشا که‌ید، ره‌نگه‌یل جیاواز جل و به‌رگ کوردی له‌ چه‌و مه‌ردم شانازی که‌ن. وا هه‌رده‌م وه‌ل خوه‌ێیا ده‌نگه‌یل ره‌نگین تییه‌رێـد و به‌ێـد.
فره‌ له‌ مه‌ردم وه‌ سه‌ر پاوا تماشاکه‌ر به‌رنامه‌ هه‌ن به‌ڵام هیچ که‌س له‌ ئێ هه‌مگه‌ ده‌نگ و ره‌نگه‌ هه‌ست شه‌که‌تی وه‌ خوه‌ێ رێ نیه‌ێـد.
هه‌ناێ ناو «شه‌هرام نازری» ئڕا هاتن و پشت تریبۆن تیه‌ید؛ ده‌نگ چه‌پ و هاوار مه‌ردم تا ئاسمان چوود. ئۆستاد نازری یه‌کم جار له‌ ئێ کار‌ به‌نرخه‌ و تێـکووشانه‌یل «عه‌لی ئه‌کبه‌ر مۆرادی» سپاس و قه‌ێـرزانی که‌ێـد و له‌یه‌ ک یه‌ێ جار تر له‌ داوان ئێل و باوان کوردایه‌تی خوه‌ێ جی گردێه‌؛ جی خوه‌شاڵی و به‌خته‌وه‌ری زانێـد. ئیکه‌ش چه‌ن به‌یت له‌ مه‌ولانا وه‌ شیوه‌ێ ئاواز خوه‌نێدن که‌ خه‌ێاڵ هه‌ر ئاێه‌مێگ وه‌ل خوه‌ێا به‌ێـد. هه‌ناێ خوه‌نین ئێ چه‌ن به‌یته‌ وه‌ په‌رتخ ره‌سێـد. گه‌ل مه‌ردم وه‌گه‌رد مه‌یل و زه‌وق فره‌ێگ له‌ ئۆستاد نازری توان که‌ ئڕاێان کوردی بخوه‌نێـد؛ شه‌هرام نازری له‌نوو ده‌س پێ که‌ێـد:
دڵ ئـه‌ی داده‌تـه‌ن، دڵ ئـه‌ی داده‌تـه‌ن
له‌ ده‌س ئی ده‌وران داد هه‌ی داده‌ته‌ن
له‌ێره‌سه‌ که‌ هه‌ر ئاێه‌مێگ له‌ دڵ و گیان وه‌ کورد بیون خوه‌ێ شانازی که‌ێـد.
«که‌یهان که‌ڵهوڕ» و «حۆسه‌ین عه‌لیزاده‌» ته‌نیا وه‌ گه‌رد گه‌په‌یل کوڵێگ له‌ێ جه‌رخه‌ به‌شداری که‌ن؛ گه‌په‌یلێگ که‌ هه‌رکامێیان ده‌نگ هیوا وه‌ بانان رووشن له‌ناوێیان تییه‌ێـد.
مه‌یله‌واری فره‌ێ مه‌ردم ئڕا وێـنه‌ گرتن وه‌ل ئێ ژه‌نێاره‌یل خاون ناوه‌ خوه‌ێ یه‌ێ وتار جیا تواێـد تا له‌ سه‌ره‌ێ گه‌پ بێـه‌ید!
په‌رته‌و کرماشانی؛ شاعر غه‌زه‌ڵ کوردی ناسیاێ «ئه‌رمه‌نی» وه‌ گه‌رد هه‌واخوای گه‌ل تیه‌ێده‌ پشت تریبۆن و ده‌س که‌ێده‌ خوه‌نستن شێعر پڕهازێگ:
«هه‌م یار گیانی هاتـێیه‌ هه‌م ئه‌ێـده‌ هه‌م مانگه‌شه‌وه‌
مردم خودا داخم ئه‌ڕاێ یه‌ێ شیشه‌ له‌و به‌دمه‌سه‌وه‌»
وه‌ راس شنه‌فتن ئێ شێعر پـڕ له‌ هیورمانه‌ وه‌ ده‌نگ په‌رته‌و هه‌ست جیاوازێگ دێـرێـد.
ئۆستاد «په‌رته‌و» دویاخر شێعرێگ خوه‌نێـد که‌ نیشان له‌ ناو گه‌وراێ ژه‌نیار هاوچه‌رخ دێـرێـد و ئه‌ڵبه‌ت په‌ژاره‌ێ تییه‌ڵێـگ ها له‌ تێ:
کوشریامه‌ وه‌ ناحه‌ق هه‌ێ روو هه‌ێ روو
شــه‌یوه‌ خیـونینه‌گـه‌م که‌یــنه‌ تــــوک چوو
وه‌ دار مــه‌و ئــه‌ڕام تـه‌رمێـگ بســازن؛
ته‌میوره‌گه‌ێ «مۆرادی» شین که‌رم بوو
هه‌ناێ خڕێگ وه‌ ناو خانه‌ تنبور خوه‌م؛ هه‌ست که‌م ده‌نگ نادیارێگ له‌ قیولی تاریخه‌و چـڕێـده‌م؛ هه‌ست نه‌نوومه‌تێگ ته‌مام گیاند گرێده‌ وه‌ر؛ وه‌ راس په‌یوه‌ندی مێژووئی گه‌ل کورد وه‌ل مووسیقا و هـۆنه‌ر له‌ هیچ سه‌رده‌مێگ وه‌ په‌رتخ نیه‌ڕه‌سێــد.
رێ و ره‌سم ئمڕوو وه‌گه‌رد هووره‌ چڕین و موور هاوردن ئدامه‌ پێا که‌ێـد. په‌رتخ خاس ئێ به‌رنامه‌ێ باێه‌خداره‌ ک تا هه‌میشه‌ له‌ ناو زه‌ێن گشت به‌رده‌وام مینـێـدن؛ ئجراێ گرووپه‌یل ته‌میوره‌ێ «شاخوه‌شین» «دایراک خاتوون»ــه‌ ک هیورمان ره‌نگینێگ وه‌ زه‌ێن‌ خاتر به‌رده‌نگه‌یل وه‌ جی هیلن.
‌هه‌رسه‌ێ دڵ که‌نین له‌ جه‌رخه‌ێ گه‌رم هۆنه‌ر و مووسیقاێ کوردی ئڕامان سه‌خته‌؛ به‌ڵام هێـواداریم که‌ په‌رتخ ئێ جه‌شنواره‌، ده‌س پێ کردن دواره‌ێگ بوود ئڕا کاره‌یل گه‌ورا له‌ باوه‌ت زوان و فه‌رهه‌نگ کوردی.
دویاێ وه‌ په‌رتخ هاتن به‌رنامه‌؛ له‌ دڵ تیه‌ریکان شه‌وار که‌فیمنه‌ رێ... به‌ڵام رێ فره‌ دیورێگ له‌ وه‌رمان نییه‌!

انتشار در هفته نامه صدای آزادی شماره ۵۰۴ بخش کُردی

اطلاعات شما ذخيره شود ؟