گل اسريل آهو
شهوي زهخمهيل نوو نوو چيوزه دهيدن
شهوي دهردهيل كوو كوو چيوزه دهيدن
شهوي وه ئزن شاي گهورهي خوراسان
گول ئهسرهيل ئاهوو چيوزه دهيدن
*
ترف تيون!
گول ئهسرهيل ئاهوو پر لهخيونه
خودا زاني گ حال ئيمه چيونه
چهنيگه كهوترهيل گومبهزهيلي
له داخ نوو گولهيلد تهرف تيونه
*
عطرگهي شوبو
كهمي كهوتر ، كهمي ئاهوو بوارن
خودايا عهترهگهي شهوبوو بوارن
دواره لهي كهوين گومبهزهيله
دهسيگو يهي عهلهم چيو كوو بوارن
*
چهنيگه ...!
چهنيگه ژان بهش بالهيل ئيمهس
چهنيگه شهو رهنگ تالهيل ئيمهس
عهلهمدار و خهم وخيون و پهژاره
چهنيگه مهخش ئي سالهيل ئيمهس
*
آگر بریل !
خودايا شين و وهي چوهس لهي شهوهيله
چماني رو رو ئاگر بهرهيله
دواره شام عاشووراس و شين كهن
فريشتهيل فهلهك راي بيسهرهيله
*
زهلان هاتو...
چنگي واران ، چنگي گيسه ، چنگي خيون
زهلان هاتو وهقينهو ههلكهني سيون
بهش ئات و عهيالد دهردو داخه
حوسهين گيان ! خهيمهگاند جار تر بيون
*
دواره هاتيه...
دواره هاتيه رووژيگ دهرده
دلم گير خهمهيل دهورهگهرده
دواره ئمتهحان سهخته ياران
ئراي ياري حوسهين كي لهيره مهرده ؟!
*
بهشم ئاگر...
بهشم ئاگر لهئي زمسانه بارن
رچگياس ئاسووهيلي گ ديارن
هزار و سيسه دو چهن سال سهخته
تمام ئهورهگان خيون لهيره وارن
*
بي چراخ ...
تمام ئهورهگان گيرن وه داخهو
تمام وهلنگهگان شين كهن وه باخهو
هزار وسيسه دوچهن ساله سهركهن
تمام شامهگان وه بي چراخهو
*
عهلهمدار خهمهيل خيون وه شان...
بيهن ئاگر له ئازاگهي سقانم
گ شايهد زهخمهگهي گيان ههلكلانم
لهداخ ئهو عهلهمدار شههيده
عهلهمدار خهمهيل خيون وه شانم
*
ههناي ئي مانگه تي...
ههناي ئي مانگه تي ئاگر گري گيان
مهلهيل خهم خوهنن له سهر كلاوان
تهمام شانيهيلي بهش بهشهو كهن
خهم مهرگ حوسهين داوان وه داوان