دنیا تەمەو دنیا تووز ... / ظاهر سارایی . ایلام
دنیا تەمەو دنیا تووز، 
دنیا گەرتەچۊچانه
کەسێ کەسێ نیەناسێ، 
گیشتێ دەم ئەڵپێچانه

نه بوو هەناس ِعشقه، 
نه ڕووژنای ڕاسی
دنیاخراو، دنیا گەن،
 دنیا دروو دەسانه

زەمین زەرد و زەمان زەرد، 
ئاسارەو ئاسمان زەرد
کوتێ داخیم کوتێ دەرد ، 
دە ئێ  زەرده لۊلانه

تەو ئەڵکزان سقانم
 لەرز  ئەڵچەقان دنانم
 گیانم بۊه پەتەسوو ،  
دەێ   ئاگر  گڕانه

شڵەێ شەڕەو گڕەێ نار، 
گرمەێ گورگەو هافەێ مار
یەکەێ  بەخته بێداده، 
یەکەێ  تاڵەس؟ تاڵانه

هەم زەردەواێ  پەژارەس، 
هەم سەردەواێ پەشێوی
 ڕوو دەێ  زەرده  زەمانه،  
وەێ  دەێ سەرده ساڵانه

ئاگر ها ده دەرۊنم ،
زەهراو  ها  نام ِ خۊنم
ئووخەیم  پڕ ده  ئاخه،
ژیانم  پڕ ده  ژانه

زەمین زەخم و زەمین زار، 
زەمین ژەهر و زەمین ژار
زەمین پەلامێ بڕێا، 
زەمین  بێ ئاسمانه

باڵ فرێشته رزیا، 
باخ  بهەێشت  ئەڵکزیا
 دووزەخ هفاو دا دنیا، 
ئێ ئژدهاێ خوڕانه

ئێ بار پڕ ئەنیشه، 
ئاخر ئەڕا چه کیشیم
ئێ هەمگه عەزاوه، 
ئاخر  ئەڕا چه مانه ؟

وڵ که خیاڵ هاتگ، 
بڕواکن  ئێ هەناسه
وڵ که پەژارەێ ناتگ،
 مەس بوو ده ئێ ئەلانه

تووز تیەڵەو تەم  ڕەش، 
کول کەفتنه کەش‌ئەڵ‌کەش
کەس دەر نیەچوو وه بێ‌بەش،
مەردم ! ده ئێ قڕانه

دارەێل ئەڕاچه هشکن،
 گوڵەێل ئەڕا نیەوشکن 
قەناریەێل ِ دڵ‌تەڕ،
 بێ‌دەنگ   ئەڕا وسانه

ئەورەێلمان  مەزووکن ،‌ 
تافەێلمان مەرێژن     
 نه تافەتاف ِ رێژاو ، 
نه نم‌نم وارانه

نه ڕووسەمێ دیاره
نەیشه  ئسفەندِیارێ
نه شوون ِ قارەمانه  
نه نوون ِ  پاڵەوانه

نه دین ماگه نه ئێمان،
ساهڵ ڕەم کەێ ده سامان
هووش و گووش و پووسمان، 
پڕده شەڕ و شەێتانه

زەمانه پاوەمانگه،
 ئەوجار ئەڵامەت ئاورد
ئێجار بزانیم چه زاێ 
ئێ  ژن ِ زاوەرانه

شکیا  دڵ و پێشتمان، 
کردنه  ئاڵێشتمان 
گم بۊمنه گێشتمان، 
ده ئێ  چوارده رێانه

نه چەفتیمن نه ڕاسیم، 
نه گەنیمن نه خاسیم
بڕێ خوەمان مەناسیم، 
مایمه دەێ نام  مەرزانه

زوانمان  شێویا،  
بۊه   وەفر  و  تێویا
تێوێگوه جوور وەفر، 
هەر کەس ک  بێ زوانه

 پەلام  ئەو کی بوەیمن، 
دەێ  زەرد ِ بێ‌زەواڵه
هاوار ئەو کوو بکیشیم،  
دەێ هۊچ  بێ‌هچانه

بڕێ گورگن  دنان هار، 
دەێ جەنگەڵ جنوونه
 بڕێ  وەرکن وه‌رەلا، 
دەێ دەێشت ِ بێ‌شوانه

بارێ ها  بانِ کووڵم، 
چنه کۊەێ  بانکووڵه
  قیڕەێ  ها  قوڕن ِ دڵم، 
چنه  قڵاقیڕانه

خوە‌زەو ڕها بێاتایم، 
ڕووژێ  وه کام و حەزرەت
ده ئێ زرپ  و زوورانه، 
ده ئێ گورز و گووچانه

خوەزەو  واران بوارێ، 
دەێ هەڵەت ِ هەڵاکه 
خوەزەو شةفەق  بوشکێ
دەێ  شەو ِ بێ بەێانه

قسیەم ڕاسه شەکەته،
 خوەزەو نامەێ ئمێده
  شێعرم ڕاسه لەت لەته،
 بەزەی نامەێ ژیانه
...



نظرات [۸]
جمعه، ۰۸ شهریور ۱۳۹۸ :: ۱۸:۰۷
اسا ظاهر هر بژی کورد
چهارشنبه، ۱۵ مهر ۱۳۹۴ :: ۲۰:۱۱
ده س مه ریزاجناب سارایی جالب بیوا
یکشنبه، ۱۰ اسفند ۱۳۹۳ :: ۱۹:۳۰
سه لام وه خه زمه تێ جه نابێ ئۆستاد "سارایی" عه زیز! ده س خوه ش بڕا گیان ئه را ئی په ره شیعره ئه سه دۆعام ده خۆدا یه سه که هه میشه سه ر به رز ئوۆ کامران بوۆی...
دوشنبه، ۱۱ فروردین ۱۳۹۳ :: ۰۰:۴۰
سلام آقای سارایی اول بار که ا شعرته خونسم پر نام هر دچمم اسرو بی و خدا شعرت لیوه نه تنیا مه هن ولات کلی کردگه چون جز حقیقت چشتی د نام نیه افرین و تو او و هرکه ارا زوان کردی زحمت کیشی بویچگ سرکار حافظ بهادری
سه شنبه، ۰۸ بهمن ۱۳۹۲ :: ۱۱:۲۵
عالی است
جمعه، ۱۲ مهر ۱۳۹۲ :: ۰۹:۱۶
در یک کلام شعری بسیار زیبا ست که توانمندی شاعر عزیز جناب آقای ظاهر سارائی را نشان میدهد . برای این استاد ارجمند توفیقات روز افزون آرزو میکنم.
یکشنبه، ۰۳ شهریور ۱۳۹۲ :: ۱۹:۱۰
مدتها منتظر این شعر بوده ام . قبلا با صدای اقای سارایی شعر رو شنیده بودم اما اینجا هم منو به اون حس و حال انداخت . منتظر شعرای خو دیگه ای از آقای سارایی هستیم
یکشنبه، ۰۳ شهریور ۱۳۹۲ :: ۰۰:۱۶
بسیار عالی قشنگ بود احسنت.
اطلاعات شما ذخيره شود ؟