جه‌شنواره‌ مناڵ، وه‌ خاسی که‌فته‌و رێ / گه‌پیگ وه گه‌رد موعاون فه‌رهنگ و ئرشاد ئلامی ئیلام
جه‌شنواره‌ مناڵ، وه‌ خاسی  که‌فته‌و رێ / گه‌پیگ وه گه‌رد موعاون فه‌رهنگ و ئرشاد ئلامی ئیلام
هۊچ که‌س نیه‌تۊنێ چه‌و خوه‌ێ له‌ جێ پای قورس شێعر له‌ ناو ژیان ئایه‌مه‌یل له‌ دریژاێ دیرووک بوه‌سێ. شێعر هاوساێ رووح و گیان تمام ئایه‌مه‌یل بان کۆروێ زه‌ۊه‌. له‌ی باوه‌ته‌ وه‌ دڵنیایگه‌و تۊنیم بۊشیم شێعر جامه‌ک رووح ئایه‌مه‌.

✅♦️جه‌شنواره‌ مناڵ، وه‌ خاسی  که‌فته‌و رێ
گه‌پیگ وه گه‌رد موعاون فه‌رهنگ و ئرشاد ئلامی ئیلام

🔺وت و وێژ : ئه‌شکان میری/ هۊچ که‌س نیه‌تۊنێ چه‌و خوه‌ێ له‌ جێ پای قورس شێعر له‌ ناو ژیان ئایه‌مه‌یل له‌ دریژاێ دیرووک بوه‌سێ. شێعر هاوساێ رووح و گیان تمام ئایه‌مه‌یل بان کۆروێ زه‌ۊه‌. له‌ی باوه‌ته‌ وه‌ دڵنیایگه‌و تۊنیم بۊشیم شێعر جامه‌ک رووح ئایه‌مه‌. 
🔺خوه‌شی، ته‌نگی، قین، قار، مه‌رگ، له‌ دایێگ پێا بین و... ئێه‌ شێعر بیه‌ ک گه‌رد ئایه‌مه‌یل هه‌نگاو هه‌نگاو له‌ مێژوی ژیان هاتێه‌. له‌ نه‌ته‌وێ کۆرد شێعر مناڵ گه‌رد مه‌ته‌ڵ و لاوه‌ لاوه‌ په‌یوه‌ندیگ گه‌وره‌ گه‌رد ئه‌ده‌بیات و هۆنه‌ر ئه‌ێ نیشتمان ره‌نگینێ دێرێد و تۊنیم بۊشیم بنچینه‌ێ مۆسیقای کۆردی دامه‌رزانیه‌. له‌ کاتێگ ک له‌ داخه‌وه‌ هۊر کردن و قسه‌ کردن له‌ زووان کۆردی له‌ ناو مناڵه‌یل رووژ ئاواێ ئێران نزێ که‌مو بیه‌ و ورده‌ ورده‌ دێرێد وه‌ره‌و له‌ هۊر چوون که‌ێد جێ گرنگ شێعر مناڵ فره‌تر خوه‌ێ دیار ده‌ێد. 
🔺شێعر مناڵ ئه‌ویش له‌ زووان داڵگی تۊنێد جواوێگ خاس ئڕا ئتیاج مناڵه‌یل وه‌ موسیقا به‌ێد و زێهن و زه‌وق و عاتفه‌ێ ئه‌وان گه‌وره‌ و پۆخته‌ بکه‌ێد. سه‌باره‌ت له‌ خاسی شێعر مناڵ، جه‌شنواره‌ێ شێعر کۆردی مناڵ له‌ ئێوان رووژئاوا رێ که‌فت و تۊنست‌ جێ خوه‌ی له‌ خاسی له‌ ناو ئایه‌مه‌یل دیار کۆرده‌واری واز بکه‌ێد. سه‌باره‌ت له‌ی جه‌شنواره‌ وت و وێژێگ گه‌رد ئاقای عومران خودئامووز موعاون کاره‌یل فه‌رهه‌نگی و ره‌سا‌نیی ئداره‌ی کۆل فه‌رهه‌نگ و ئرشاد ئسلامی پاریزگه‌ی ئیلام و جێنشین شه‌رواێ سیاسه‌ت نایێن جه‌شنواره‌ی شێعر کۆردی مناڵ، دێریم ک پێشکه‌شدان که‌یم: 
🔺ئڕا یه‌کمین پرسێار تواستیم بزانیم فکر رێ خستن جه‌شنواره‌ شێعر کۆردی مناڵ له‌ کوو گیرێا؟ 
فکر رێ خستن ئه‌ی جه‌شنواره ئڕا یه‌کمین که‌ڕه‌ت‌ سال ۱۳۹۲ ‌گه‌رد ئه‌نجومه‌ن شێعر و ئه‌ده‌ب ئه‌یوان رووژئاوا وه‌تیم به‌ڵام ئه‌و وه‌خته‌ قه‌بوول کردن و رێ خستن و شوون گرتنێ ئڕا ره‌فیقه‌یل شاعێرم که‌م بی و فره‌ تر نه‌زه‌رێان ئه‌وه‌ بی ئه‌ی جه‌شنواره‌ له‌ سه‌ر شێعر گه‌وره‌ ساڵه‌یل کار بکه‌ێد تا مناڵه‌یل، به‌ڵام شوون که‌فتن به‌نده‌ ئڕا هه‌ڵ داێن و رێ که‌فتن ئه‌ێ جه‌شنواره‌ سه‌باره‌ت له‌ ئامانجێگ ک ئڕاێ دۊنێام سه‌مه‌ر دا و یه‌کمین ده‌وره‌ێ ئه‌ی جه‌شنواره‌ له‌ شکڵ خاسێگ گیرێا. 
🔺ئڕا چه‌ جه‌شنواره‌ رێ که‌فت؟ هۆکارێ چه‌ بی ک ئێوه‌ که‌فتینه‌ شوونێ؟ 
گرنگ ترین و گه‌وره‌ ترین وه‌زیفه‌ێ ئداره‌ێ فه‌رهه‌نگ و ئرشاد ئسڵامی رۊ کردن و متوه‌ج بیێن فه‌رهه‌نگ بوومی و بانگه‌واز کردن فه‌رهه‌نگ عومومیه‌. له‌ی باوه‌ته‌، پایه‌یل ئه‌ێ فه‌رهه‌نگ بنچینه‌داره‌ له‌ باوه‌ت بێ فکریل خوه‌مان نز که‌فتێه‌و مناڵه‌یل له‌ ناو ماڵ، مه‌دره‌سه‌ و ژینگه‌ێ ئجتماعی که‌متر له‌ سه‌ر زوان داڵگی خوه‌ێان گه‌پ ده‌ن و قسه‌ که‌ن؛ له‌ لاێگ تر زامه‌ته‌یل دۆکتور ره‌زا مۆزونی و جێ کاره‌یلیان له‌ سه‌ر مناڵه‌یل، ده‌روه‌چه‌ێگ له‌ هیوا له‌ وه‌رمان واز کرد و جه‌شنوارێگ ئڕا شێعر کۆردی مناڵ له‌ رێ خستیم.    
🔺شاعێره‌یل و مه‌ردم چۊ گه‌رد ئه‌ێ جه‌شنواره‌ و فکرێگ ک په پشتێ، رۊ وه‌ رۊ بیێن؟ 
له‌ یه‌کمین ده‌وره‌ێ جه‌شنواره‌ ک له‌ ناو مناڵ و مه‌لۊچگ رێ که‌فت، ئه‌گه‌رچه‌ شاعێره‌ل کۆردی زووان ناوچه‌ێ خوه‌مان فره‌تر له‌ ئه‌و چشته‌ هۊر کردیاێم هاتنه‌ وه‌رو، به‌لام له‌ لاێ ده‌وره‌یل تر ک دا مه‌رزێا نه‌فه‌ره‌یلێگ ک هاتۊن که‌متر بی. له‌ یه‌کمین ده‌وره‌ هه‌ر له‌ شاره‌یل ئێوان، ئسلام ئاباد رووژئاوا، سه‌نه‌نده‌ج و چه‌ن شارسان تر هاتۊن. هۆکارێگ تر ک تۊنیم ئراێ باریم ئیه‌سه‌ ک شایه‌د له‌ی باوه‌ته‌ که‌متر هاتۊن، نوو بیێن فکر جه‌شنواره‌و که‌م بیێن مه‌ێل شاعێره‌یل گه‌وره‌ ساڵ ئڕا هاتن له‌ ناو ئه‌ده‌بیات مناڵ و ئاسان بۊن وه‌تن شێعر مناڵ ئه‌ویش له‌ زووان کۆردیه‌ ک جه‌شنواره‌ مانڵ و مه‌لۊچگ ئه‌ی رێه‌ هامارو کرد، ئێسه‌ دۊنیم گشت شاعێره‌یل هه‌نینمان ئڕا ئه‌ده‌بیات ئه‌رزش نه‌ن و له‌ ناو ئه‌ی رێه‌ شێعر ئۊشن. 
 
🔺له‌ نه‌زه‌ر ئێوه‌ جێ پا ئه‌ی جه‌شنواره‌ له‌ سه‌ر فه‌زاێ فه‌رهه‌نگی رووژئاواێ وڵاتمان چه‌س؟ 
وه‌ بێ شک جه‌شنواره‌ی مناڵ یه‌کێگ له‌ خاس ترین و ره‌نگین ترین سیاسه‌ته‌یل ئڕا گه‌وره‌ کردن فه‌رهه‌نگ و ئه‌ده‌ب ناۆچه‌ی رووژئاواس و تۊنستێه‌ له‌ ناو یه‌کیگ له‌ جه‌ریانه‌یل فه‌رهه‌نگی گه‌وره‌و، ئه‌سه‌ره‌یل گه‌وره‌و جێ پا قۆرسێگ له‌ سه‌ر فه‌زاێ فه‌رهه‌نگی وڵاتمان داشتۊد. گه‌وره‌  ترین ده‌لیل ئه‌ی قسه‌، فره‌ بیێن که‌یفیه‌ت و تعداد شێعره‌یل له‌ ناو جه‌شنواره‌س و به‌ڵاو بیێن شاعره‌یل له‌ ناو ناوچه‌و و ناو نایێن ئێوان رووژ ئاوا خاون جه‌شنواره‌، له‌ ناو ''پایته‌خت شێعر کۆردی مناڵ'' له‌ ده‌س داوه‌ره‌یل جه‌شنواره‌ بی.

🔺جه‌شنواره‌ ئیمساڵ گه‌رد ساڵان چ جێا‌وازێگ داشت؟
له‌ جه‌شنواره‌ ئێمساڵ ۱۲۰ نه‌فه‌ر له‌ فره‌تر له‌ ۲۰ شارسان گه‌ردمان په‌یوه‌ندی گرتن و ۷۴۳ کار له‌ دریژاێ جه‌شنواره‌ دپه‌یک کرێا. بێجگه‌ له‌و خاسیه‌یله‌ ک وه‌تم، گه‌وره‌ ترین خاسی جه‌شنواره‌ ئێمساڵ ک فره‌ هیوا دارمان کرد ئڕا ره‌سین له‌ ئامانجه‌یل جه‌شنواره‌، به‌ش داری کردن مناڵه‌یل و گرتن تریبون جه‌شنواره‌ بۊ، له‌و جێگه‌ ک که‌فتۊنه‌ نوای شاعێره‌یل گه‌وره‌ ساڵ و خوه‌یان له‌ نوای گشت له‌ ره‌دیف ئه‌وه‌ڵ ساڵن دانۊشتۊن. 
🔺له‌ دڵنیایگو ئۊشم ئه‌ی ئتفاق گه‌وره‌ ک مناڵه‌یل له‌ ره‌دیف نووا و کاروه‌ده‌سه‌یل له‌ دۊا نۊشتۊن هه‌ر له‌ جه‌شنواره‌ی ئێمساڵ شێعر مناڵ که‌فت. جێاوازی تر، قه‌وڵ و قه‌رار گشت شاعێره‌ل ئڕای هاتن قورس تر له‌ جه‌شنواره‌ ساڵه‌یل بانان بی. سه‌باره‌ت له‌ی باوه‌ته‌، بان چیێن ره‌ده‌ێ جه‌شنواره‌ و فره‌ بیێن به‌شه‌یل ره‌نگین به‌رنامه‌ یه‌کێگ تر له‌ جێاوازی جه‌شنواره‌ ئێمساڵ گه‌رد ساڵه‌یل تر بی. ئه‌ڵبه‌ت په‌یوه‌ندی گرتن و هاتن شاعێره‌یل وه‌ناو بانگ ملی له‌ ئێلام و شاره‌یل تر له‌ی جه‌شنواره‌ فره‌ گرنگ و خاس بی. 
🔺بانان جه‌شنواره‌ چۊ دۊنین؟ 
له‌ لاێ م جه‌شنواره‌ مناڵ، وه‌ خاسی رێ که‌فتێو ها له‌ حاڵ گه‌وره‌ بیێن. چاپ و به‌ڵاو بیێن شێعر شاعره‌یل له‌ ناو کتاو، فایل شنه‌فتنی و مه‌تنی له‌ ناو فه‌زاێ حه‌قیقی و مه‌جازی، هیوا و رخوا ئێمه‌ ئڕا دا مه‌رزانن و وه‌ دریژه‌ هاوردن ئه‌ی جه‌شنواره‌ێ گرنگ و ئستقباڵ بنه‌ماڵه‌یل ئڕا ئامووزش شێعر کۆردی له‌ مناڵه‌یل و زه‌بت و به‌ڵاو کردن ئه‌وانه‌ تۊنێد ئه‌ی جه‌ریان فه‌رهه‌نگیه‌ گه‌وره‌ بکه‌ێد. له‌ی باوه‌ته‌ پشت گرتن کاروه‌ده‌سه‌یل ره‌ده‌ بان له‌ به‌ش به‌رنامه‌ و بودجه‌ له‌ی هه‌ڵکه‌فته‌یل فه‌رهه‌نگیه‌ و ئه‌سه‌ر دار، فه‌رز و لازمه‌. 
🔺ئڕا به‌ڵاو بیێن ئه‌ده‌بیات کۆردی مناڵ له‌ ناوچه‌ی رووژئاوا، رێ حه‌ڵ ئێوه‌ چه‌س؟ 
بێجگه‌ له‌ دریژه‌ هاوردن ئه‌ی جه‌شنواره‌ و پشت گرتن فره‌ تر له‌ لێ، پیشنه‌هادم ئێه‌سه‌ گه‌رد گه‌وره‌ تر کردن ئمکانات و جێ ده‌سگائێلێگ ک گه‌رد فه‌رهه‌نگ و ئامووزش مناڵ په‌یوه‌ندی دێرێن، جێ ئڕا رقابه‌ت کاره‌یل ئه‌ده‌بی مه‌نزووم و مه‌نسوور ئه‌ده‌بیات کۆردی سه‌باره‌ت وه‌ ئه‌ده‌بیات مناڵ فره‌تر و بوود و ئامووزش ئه‌ده‌بیات کۆردی له‌ ناو مه‌دره‌سه‌یل و وه‌رجه‌ مه‌دره‌سه‌ فره‌تر شوون گیر بوود. 
 🔺ئامانج جه‌شنواره‌ ئڕا بانان چه‌س؟ 
ئامانج ئێمه‌، داگیر کردن هووڵ پارێزان فه‌رهه‌نگ و زووان کۆردی له‌ ناو بنه‌ماڵه‌یل و قسه‌که‌ره‌یل کۆردیه‌. ئه‌ڵبه‌ت ئه‌ی ئامانجه‌ گه‌رد یارمه‌تی ده‌سگائێل تر، زانستگا و سدا و سیما پارێزگاگان له‌ مه‌نزل ره‌سێد. 
سپاس له‌ ئێوه‌، قسه‌ی په‌رتخ... 
🔺له‌ ته‌واو یارمه‌تی که‌ره‌یل مه‌عنه‌وی ئه‌ی جه‌شنواره‌، وه‌ تایبه‌ت مۆعاون فه‌رهه‌نگی وزاره‌ت ئرشاد، نه‌فه‌ره‌یل شه‌ورای سیاسه‌ت نایێن، وه‌رپرس و نه‌فه‌ره‌یل کۆمیته‌یل، شاعره‌یل، مناڵه‌یل و خه‌لک فه‌رهه‌نگ پارێز ئه‌ێوان رووژئاوا ک وه‌ خاسی و خاون ئه‌ی جه‌شنواره‌ بیێن وه‌ تایبه‌ت له‌ وه‌رپرس و نه‌فه‌ره‌یل سایت ره‌نگین بلوط و هه‌فته‌ نامه‌ێ صدای آزادی، ک گه‌رد ئه‌ێ جه‌شنواره‌ رێ هاتن و یارمه‌تی که‌ر ده‌بیرخانه‌ بیێن قه‌ێرزانی که‌م و قه‌ێرزان مێهر دۆکتور ئاهه‌نگه‌رنژاد هه‌نین و کۆمه‌که‌یل گه‌ورایان هه‌م.

انتشار در هفته نامه صدای آزادی / شمارۀ ۵۱۴
♦️ https://t.me/wsedayeazadi
اطلاعات شما ذخيره شود ؟